In urbe Mexico pyramis inventa
13.04.2006

Archaeologi in meditullio megalopolis Mexici pyramidem circiter mille quingentorum annorum invenerunt.

In actis diurnis Mexicanis scriptum legitur opus illud duodeviginti metra altum in collem quendam in illa urbe situm olim inclusum esse ibique usque ad nostrum tempus latuisse.

Hoc eo mirabilius esse videtur, quod catholici quotannis in cacumine eiusdem montis dies festos paschales celebrare solent.

Veri simile est illam pyramidem ab eisdem hominibus erectam esse, qui urbem priscam nomine Teotihuacam aedificaverunt.


Reijo Pitkäranta
Nuntii Latini, Finnish Broadcasting Company (YLE)
(used with permission)

For more news in Latin, be sure to check out Ephemeris : Chadiae moderatores legationem ex Sudania revocavisse

... and we're happy to see Akropolis World News back from hiatus: 7 generals ask Rumsfeld to quit - Prodi rejects Berlusconi's offer