Militantes medicamentis utuntur
30.12.2005

Iuvenes, qui in exercitu Finniae munus militiae faciunt, plura medicamenta consumere solent quam aequales eorum, ut ex dissertatione in Universitate Helsinkiensi conscripta patet.

Ex viris militantibus tres fere partes nuntiaverunt se duabus superioribus septimanis aliquod remedium sumpsisse. Tertia autem pars eorum aperuit se inter tres septimanas etiam trinis diversis pharmacis usam esse. Tantum materiae medicae usum admodum copiosum aestimaveris, si respicias de iuvenibus agi, quorum valetudo inspectione medicinali non ita pridem peracta bona reperta sit.